لاہور ہائیکورٹ میں نگراں وزیراعظم انوار الحق کاکڑ کو عہدے سے ہٹانے کیلئےانٹرا کورٹ اپیل پر سماعت ہوئی۔

دوران سماعت سرکاری وکیل نے کہا کہ الیکشن کمیشن نے عام انتخابات کا اعلان کر دیا ہے، 8 فروری کو عام انتخابات ہونے جا رہے ہیں، الیکشن کمیشن نے بیلٹ پیپرز کی چھپائی شروع کر دی ہے ، جس کے بعد درخواست غیر مؤثر ہو چکی ہے۔

سرکاری وکیل نے درخواست خارج کرنے کی استدعا کردی۔

انٹرنیٹ سروس کی بار بار بندش اور تعطل کا معاملہ سندھ ہائیکورٹ پہنچ گیا

انوار الحق کاکڑ کے خلاف دائر درخواست میں مؤقف اختیار کیا گیا ہے کہ 15 نومبر کو نگران وزیر اعظم کی 90 روز کی آئینی مدت مکمل ہو چکی، 90 روز کے بعد نگران وزیراعظم کا عہدے پر برقرار رہنا غیر قانونی ہے۔

لاہور ہائیکورٹ کے دو رکنی بینچ نے دلائل سننے کے بعد نگراں وزیراعظم انوار الحق کاکڑ کو عہدے سے ہٹانے کیلئے انٹرا کورٹ اپیل پر فیصلہ محفوظ کرلیا۔

بعد ازاں عدالت نے محفوظ فیصلہ سناتے ہوئے کہا کہ الیکشن شیڈول جاری ہوچکا ہے اور نئی حکومت بننےجارہی ہے، 8 فروری کو ملک میں الیکشن کا انعقاد ہونے جارہا ہے۔

عدالت نے لکھا کہ سپریم کورٹ میں بھی اسی نوعیت کا کیس زیرالتوا رہا ہے، ایسی درخواست کیلئے یہ مناسب وقت نہیں ہے۔