گزشتہ ماہ سابق کپتان اے بی ڈی ویلیئرز کی جانب سے اپنے سوشل میڈیا شو کے دوران دعویٰ کیا گیا تھا، جس کے بعد بھارتی میڈیا پر بھارتی کرکٹ ٹیم کے سابق کپتان ویرات کوہلی اور اداکارہ انوشکا شرما کے ہاں دوسرے بچے کی متوقع پیدائش کی خبریں آنا شروع ہو گئی تھیں۔

ویڈیو میں سابق کپتان نے بتایا کہ دوسرے بچے کی پیدائش کے منتظر ہیں، ویرات اس وقت بالکل ٹھیک ہیں اور اچھا وقت فیملی کے ساتھ گزار رہے ہیں، فیملی کے ساتھ وقت گزارنے کے لیے انہوں نے انگلینڈ کے خلاف ٹیسٹ میچز چھوڑ دیے۔

اے بی ڈی ولئیئرز کے اس بیان کے بعد بھارتی سوشل میڈیا پر بھی ویرات کوہلی اور اداکارہ انوشکا شرما کو مبارکباد کے پیغامات ملنا شروع ہوگئے۔

تاہم اب یوٹرن لیتے ہوئے سابق جنوبی افریقن کپتان کا کہنا ہے کہ میں نے اس وقت غلط معلومات شئیر کر کے بڑی غلطی کی، میری معلومات بالکل درست نہیں تھیں، کوئی نہیں جانتا کہ اصل بات کیا ہے اور ان کی فیملی میں کیا ہو رہا ہے۔

اے بی ڈی ولیئیرز کی جانب سے مزید کہنا تھا کہ میں ان کے اور ان کے اہلخانہ کے لیے نیک خواہشات کا اظہار کرتا ہوں، سیریز میں وقفہ لینے کی وجہ کچھ بھی ہو، لیکن مجھے امید ہے کہ ویرات کوہلی اپنے اہلخانہ کے ہمراہ بالکل ٹھیک ہوں گے۔