قومی اسمبلی حلقہ این اے 99 فیصل آباد میں میں عمران خان نے عاصم منیر سے زیادہ ووٹ حاصل کیے ہیں۔

ویسے تو اس حلقے سے آزاد امیدوار عمر فاروق نے ایک لاکھ 20 ہزار 686 ووٹ لے کر جیت حاصل کی ہے، لیکن یہاں سے کھڑے امیدوار عمران خان نے 15 ہزار 96 ووٹ لے کر تیسری پوزیشن حاصل کی، جبکہ عاصم منیر 2 ہزار 809 ووٹ لے کر دسویں نمبر پر آئے ہیں۔

اب جیسا کہ آپ سوچ رہے ہیں ویسا کچھ بھی نہیں ہے، دراصل عاصم منیر جماعت اسلامی کے امیدوار ہیں اور عمران خان نے تحریک لبیک پاکستان کے ٹکٹ پر انتخابات میں حصہ لیا ہے۔

خیال رہے کہ بانی پی ٹی آئی عمران خان گزشتہ کئی ماہ سے جیل میں قید ہیں اور ان کا 8 فروری کو الیکشن میں حصہ لینے کا حق بھی ختم ہوگیا ہے۔

دوسری جانب پی ٹی آئی سے ان کا انتخابی نشان بلّا بھی چھن چکا ہے، جس کے بعد اپ پی ٹی آئی کے تمام امیدوار مختلف انتخابی نشانوں کے ساتھ انتخابی میدان میں اترے ہیں۔

سال 2018 کے الیکشن میں یہ حلقہ این اے 105 تھا اور یہاں سے تحریک انصاف کے امیدوار رضا نصر اللہ کامیاب ہوئے تھے جب کہ مسلم لیگ ن کے محمد فاروق بہت کم مارجن سے دوسرے نمبر پر رہے تھے۔ محمد فاروق اس مرتبہ پھر حلقے سے امیدوار ہیں۔

یہ وہی محمد فاروق ہیں جن کا ٹکٹ کے معاملے پر اپنے بیٹے سے جھگڑا پارٹی اجلاس میں سامنے آیا تھا اور نواز شریف نے باپ بیٹے کی صلح کرا دی تھی۔