ملک میں حکومت سازی کیلئے کون کس کے ساتھ ہے ؟ موجودہ حالات و واقعات دیکھ کر یہ اندازہ لگانا قبل از وقت ہوگا۔

سیاسی منظر نامے پر ایک اور اہم ملاقات ہوئی ہے اور یہ ملاقات پاکستان تحریک انصاف (پی ٹی آئی) سے تعلق رکھنے والے ملک عامر ڈوگر اور پیپلزپارٹی کے رہنما اور اسپیکر قومی اسمبلی راجہ پرویز اشرف کے رمیان ہوئی۔

پی ٹی آئی رہنما عامر ڈوگر نے راجہ پرویز اشرف کے گھر جا کر ان سے ملاقات کی۔

ذرائع کا کہنا ہے کہ ملاقات میں ملک کی مجموعی سیاسی اور انتخابات کے بعد کی صورتحال پر تفصیلی تبادلہ خیال کیا۔

عامر ڈوگر نے اسپیکر قومی اسمبلی راجہ پرویز اشرف سے تفصیلی ملاقات کی اور ساتھ ہی چیئرمین سینیٹ صادق سنجرانی سے بھی ملے۔

ملاقات کے حوالے سے ذرائع نے مزید بتایا کہ پی ٹی آئی رہنما نے پیپلزپارٹی کے راجہ پرویز اشرف کو الیکشن میں کامیابی پر مبارکباد بھی دی۔

ذرائع کا کہنا ہے کہ عامر ڈوگر کے ہمراہ نو منتخب آزاد رکن جاوید وڑائچ بھی موجود تھے۔

ذرائع نے دعویٰ کیا کہ عامر ڈوگر نومنتخب آزاد اراکین کے لئے پارلیمانی لاجز کی الاٹمنٹ کے لئے اسپیکر کو ملے۔

راجہ پرویز اشرف کے جواب کے حوالے سے ذرائع نے بتایا کہ اسپیکر کا کہنا تھا کہ جب اراکین کے باقاعدہ نوٹیفیکیشن جاری ہو جائیں گے تو پھر ہی لاجز الاٹ ہوں گے۔