پشاور میں نیوز کانفرنس کرتے ہوئے مولانا عطاء الرحمان نے کہا کہ ہمیں پہلے بھی نادیدہ قوتوں سے شکایات تھی لیکن اس بار تو ریکارڈ توڑا گیا ہے۔

صوبائی امیر جے یو آئی نے کہا کہ س انداز میں ان لوگوں نے دھاندلا کرکے سیٹوں کی بندر بانٹ کی ان کو لگتا ہے یہ ملک صرف انکا ہے۔

مولانا عطاء الرحمان نے کہا کہ ریکارڈ ساز دھاندلی نے 9 مئی کے بیانیے کو دفن کردیا ہے۔

جے یو آئی کے صوبائی امیر نے کہا کہ سینکڑوں مقدمات میں ملوث ایک شحص کو وزارت اعلیٰ کا منصب دیا جارہا ہے۔

انھوں نے سوال اٹھایا کہ کیا پیغام دیا جا رہا ہے کہ کس قسم کے لوگوں کو قوم پر مسلط کیا جارہا ہے۔ 9 مئی کے واقعات سمیت سینکڑوں دیگر معاملات میں ملوث شخص سے ریاستی اداروں کے لوگ ملاقاتیں کر رہے ہیں۔ دھاندلی اور ایسے لوگوں کو قوم پر مسلط کرنے میں ریاستی اداروں کا اہم کردار ہے، ہم ان کو بتا دینگے کے قوم کس کے ساتھ ہے۔

انھوں نے کہا کہ ہفتہ دس دن میں صوبائی جماعت کارکنوں کو کال دیکر بڑا احتجاجی جلسہ منعقد کرے گی۔

ان کا کہنا تھا کہ قومی و صوبائی اسمبلی کے امیدواروں کے اجلاس کے بعد احتجاج کا لائحہ عمل طے کیا جائے گا۔