پاکستان بازار پولیس اسٹیشن کے علاقے میں دو موٹر سائیکل سوار ڈاکوؤں نے ایک شہری سے موٹر سائیکل چھیننے کی کوشش کی۔ جب شہری نے مزاحمت کی تو ڈاکوؤں نے راہِ فرار اختیار کی۔ تیز رفتاری کے ساتھ علاقے سے نکلنے کی کوشش میں ڈاکوؤں کی موٹر سائیکل سامنے سے آتے ہوئے ٹینکر سے ٹکراگئی۔

اس حادثے میں ایک ڈاکو نے موقع ہی پر دم توڑ دیا جبکہ اس کا ساتھی پیدل فرار ہوگیا۔

پولیس نے بتایا کہ ساتھی کی ہلاکت کے بعد ڈاکو موٹر سائیکل چھوڑ کر بھاگ نکلا۔ پولیس کو موقع پر اس شہری کی موٹر سائیکل بھی ملی جسے لوٹنے کی کوشش کی گئی تھی۔

پولیس کے مطابق اس امر کا جائزہ لیا جارہا ہے کہ ڈاکوؤں کی موٹر سائیکل سے ٹینکر حادثاتی طور پر ٹکرایا یا ٹینکر ڈرائیور نے ڈاکوؤں کو جان بوجھ کر ٹکر ماری۔

پاکستان بازار پولیس اسٹیشن کی ٹیم مرنے والے ڈاکو کے ساتھی کو تلاش کر رہی ہے۔