پیر کو کوئٹہ میں نواز لیگ کے نومنتخب اراکین بلوچستان اسمبلی سردار عبدالرحمان کھیتران، میر شعیب نوشیروانی اور سردار مسعود لونی کے ہمراہ ایک پریس کانفرنس سے خطاب کرتے ہوئے شیخ جعفر خان مندوخیل نے کہا کہ بلوچستان میں نواز لیگ اکثریت میں ہے اور ہم بلوچستان میں نواز لیگ کا وزیر اعلیٰ لانا چاہتے ہیں۔

ان کا کہنا تھا کہ حکومت سازی کے لیے دیگر جماعتوں کے ساتھ بات چیت جاری ہے اور دیگر جماعتیں نواز لیگ کے ساتھ مخلوط حکومت میں زیادہ مطمئن رہیں گی۔

انھوں نے کہا کہ جو اراکین آزاد حیثیت سے کامیاب ہوئے ہیں ان سے ہم رابطے میں ہیں۔

شیخ جعفر خان مندوخیل نے کہا کہ نواز لیگ کی مرکزی قیادت نے بلوچستان میں حکومت سازی کے لیے جو بھی فیصلہ کیا وہ ہمارے لیے قبول ہوگا لیکن نواز لیگ کی مرکزی قیادت نے تاحال بلوچستان کی وزارت اعلیٰ کا عہدہ پیپلز پارٹی کو دینے کے حوالے سے کوئی معاہدہ نہیں کیا ہے۔

مسلم لیگ ن کو قومی اور پنجاب اسمبلی کی مزید ایک ایک نشست مل گئی

این اے بارہ کوہستان سے آزاد رکن محمد ادریس اور پی پی دو سو بیالیس بہاولنگر سے منتخب رکن کاشف نوید نے ن لیگ میں شمولیت کا اعلان کردیا۔

شہباز شریف سے دونوں رہنماؤں نے الگ الگ ملاقات کی۔ ان سے گفتگو میں شہباز شریف نے کہا ملک کو معاشی خطرات سے بچانا اجتماعی ذمہ داری ہے، تعاون اور برداشت کے قومی جذبے سے ہی مسائل کا مقابلہ کیا جا سکتا ہے۔