اڈیالہ جیل راولپنڈی کے باہر میڈیا سے گفتگو کرتے ہوئے انہوں نے کہا کہ آٹھ فروری کے بعد اب تک دھاندلی کے ذریعے نشستیں چھینی جارہی ہیں۔

190 ملین پاؤنڈ کیس میں عمران، بشریٰ بی بی پر فرد جرم عائد

انہوں نے کہا کہ پی ٹی آئی کے لوگوں کو دو سال سے پکڑا جارہا ہے، سزائیں دی جارہی ہیں، پی ٹی آئی کی خواتین کو بھی نہیں چھوڑا، یہ ووٹس امیدواروں کے نہیں عوام کے ہیں جنہیں چھینا جارہا ہے۔

علیمہ خان کا کہنا تھا کہ جو چوری کا ووٹ لے کر اسمبلی تک پہنچے ہیں وہ پریشان ہیں، بانی پی ٹی آئی نے انڈیا کی مثال دی کہ چندی گڑھ میں بی جے پی کے لئے آر روز نے دھاندلی کی۔

انہوں نے کہا کہ امید ہے پاکستان کی سپریم کورٹ بھی بھارتی سپریم کی طرح انصاف دے گی، قانونی طور اب تمام کارروائی سپریم کورٹ میں ہوگی، عوام سارا مینڈیٹ عدالت کے ذریعے واپس لیں گے، اگر عوام کے ووٹ کی حفاظت نہیں کرسکے تو پورے سسٹم کو ردی کی ٹوکری میں پھینک دینا چاہیے۔

ان کا کہنا تھا کہ سپریم کورٹ اور ہائی کورٹ کے ججز کو سمجھ آ گئی ہے کہ کیسے دھاندلی ہوئی، تمام 45 فارم منظر عام پر آ چکے ہیں، ان کے مطابق نتائج جاری کرنا ہو گا، یہ ووٹ عوام کا ہے، جن لوگوں نے اس کی حفاظت کرنا تھی انہوں نے نہیں کی۔