بہرامند تنگی کی جانب سے ‏سینیٹ میں جمع کرائی گئی قرارداد میں کہا گیا ہے کہ ‏یوٹیوب، ٹوئٹر، فیس بک، انسٹاگرام اور ٹک ٹاک سمیت تمام سوشل میڈیا کو بند کر دیا جائے تاکہ نوجوان نسل محفوظ رہ سکے۔

خیال رہے کہ پاکستان میں پہلے ہی سوشل میڈیا پلیٹ فارم ”ایکس“ پر غیر اعلانیہ پابندی عائد ہے جسے 18 دن ہوگئے ہیں۔

بہرا مند تنگی کی جانب سے جمع کرائی گئی قرارداد کے میں کہا گیا ہے کہ سوشل میڈیا پلیٹ فارمز ملک میں نوجوان نسل کو بری طرح متاثر کر رہے ہیں۔

قرارداد کے متن میں لکھا گیا ہے کہ ان پلیٹ فارمز کو ہمارے مذہب اور ثقافت کے خلاف اصولوں کے فروغ کے لیے استعمال کیا جا رہا ہے، جس سے زبان اور مذہب کی بنیاد پر لوگوں میں نفرت پیدا ہو رہی ہے۔

قرارداد میں ’افواج پاکستان کے خلاف منفی اور بدنیتی پر مبنی پروپیگنڈے کے ذریعے ملکی مفادات کے خلاف ایسے پلیٹ فارمز کے استعمال پر تشویش کا اظہار‘ کیا گیا ہے۔

قرارداد کے مطابق ’اس بات کا مشاہدہ کیا گیا ہے کہ اس طرح کے پلیٹ فارم کو مفاد پرستوں کی جانب سے مختلف مسائل کے بارے میں جعلی خبریں پھیلانے کے لیے استعمال کیا جاتا ہے اور نوجوان نسل کو دھوکہ دینے کے لیے ملک میں جعلی قیادت پیدا کرنے اور اسے فروغ دینے کی کوشش کی جاتی ہے‘۔

بہرامند تنگی نے قرارداد میں لکھا کہ ’سینیٹ آف پاکستان نے حکومت سے سفارش کرتا ہے کہ وہ فیس بک، ٹک ٹاک، انسٹاگرام، ٹویٹر (X) اور یوٹیوب پر پابندی عائد کرے تاکہ نوجوان نسل کو ان کے منفی اور تباہ کن اثرات سے بچایا جا سکے‘۔