پی ڈی ایم اے خیبرپختونخوا نے بارش کے باعث لینڈ سلائیڈنگ اور گھروں کی چھتیں گرنے کی تفصیلات جاری کردیں۔

3 دن سے صوبے کے بالائی علاقوں میں برفباری اور میدانی علاقوں میں موسلادھار بارش کے باعث مکانات کی چھتیں گرنے اور دیگر واقعات میں 35 افراد جاں بحق ہوئے۔

سوات کے تحصیل مٹہ کے علاقہ چاتیکل میں مکان پر تودہ گرنے سے ایک ہی گھر کے 7 افراد جاں جبکہ خیبر میں بھی چھت گرنے سے ایک ہی خاندان کے 6 افراد جاں بحق ہوگئے ہیں۔

خیبر میں چھت گرنے کے واقعہ پر پولیس نے بتایا کہ افسوسناک واقعہ اتوار کی صبح خیبر کے دور آفتادہ علاقے بازار ذخہ خیل میں پیش آیا، مکان کی چھت گرنے کے باعث کمرے میں سوتے ہوئے ایک ہی خاندان کے 6 افراد ملبے تلے دب کر جاں بحق ہوگئے۔ پولیس نے مزید بتایا کہ گزشتہ 3 روز سے جاری بارشوں کے باعث مکان بوسیدہ ہوگیا تھا۔

پی ڈی ایم اے کے مطابق برفباری اور بارش کے بعد مختلف حادثات و واقعات میں اب تک 43 افراد زخمی بھی ہوچکے ہیں جبکہ مختلف واقعات میں اب تک 56 مویشی بھی ہلاک ہوچکے ہیں۔

پی ڈی ایم اے کے مطابق 346 گھروں کو جزوی اور 46 گھروں کو مکمل نقصان پہنچا۔

پی ڈی ایم اے کا کہنا ہے کہ وزیراعلی خیبرپختونخوا علی امین گنڈا پور کی ہدایت پر متاثرین میں امدادی سامان تقسیم جاری ہے۔

وزیراعلی خیبرپختونخوا نے حادثات میں جاں بحق افراد کے لواحقین کے لیے 10، 10 لاکھ روپے، شدید زخمیوں کے لیے 3،3 لاکھ اور معمولی زخمیوں کے لیے 50 ، 50 ہزار روپے معاوضوں کا اعلان کیا ہے۔

علی امین گنڈا پور کی جانب سے متاثرہ خاندانوں کے ورثاء اور زخمیوں کو فوری طور پر امدادی چیک دینے کی ہدایت کی گئی ہے۔

وزیراعلیٰ خیبر پختوںخوا نے متاثرہ علاقوں میں فوری بحالی کے لیے متعلقہ انتظامیہ کو امدادی سرگرمیاں تیز کرنے کی ہدایت کرتے ہوئے کہا کہ متاثرہ افراد کو مشکل گھڑی میں تنہانہیں چھوڑیں گے۔

مزید پڑھیں

زیرتعمیر عمارت کا ملبہ پڑوسیوں پر جا گرا، دو سالہ بچی جاں بحق

گھر کی چھت پر آگ لگانے سے چھت گر گئی، 4 افراد جاں بحق

سوات کے سیاحتی مقام کالام میں مکان کی چھت گرنے سے 2 بچے جاں بحق