دوران ملاقات بیرک گولڈ کمپنی کے وفد نے وزیراعظم کو ریکوڈک منصوبے میں پیشرفت پر بریفنگ دی۔

بریفنگ میں بتایا گیا کہ ریکوڈک منصوبے کی فزیبیلٹی رواں سال مکمل کر لی جائے گی، منصوبے پرمقامی اوربلوچستان کے ڈومیسائل کے افراد کو ترجیح دی جا رہی ہے۔

اس دوران وزیراعظم شہباز شریف نے کہا کہ چاغی میں ٹیکنیکل یونیورسٹی کا قیام، حکومت اوربیرک گولڈ مل کرکام کرسکتے ہیں، ریکوڈک منصوبہ سے صوبے کی ترقی اور خوشحالی کے نئے دور کا آغاز ہوگا۔ ریکوڈک منصوبہ بلوچستان کی ترقی کے لیے گیم چینجر ہوگا۔

وزیراعظم کا مزید کہنا تھا کہ ، بیرک گولڈ نے کارپوریٹ سماجی ذمہ داری کے تحت ریکوڈک کے قریب تین سکولز قائم کئے ہیں ، بیرک گولڈ کی جانب سے اب تک سو افراد کو فنی تربیت فراہم کی جا چکی ہے جن میں خواتین بھی شامل ہیں۔ حکومت سرمایہ کاروں کی سہولت کے لئے ہرممکن اقدامات کر رہی ہے۔

ملاقات میں وفاقی وزیر پیٹرولیم مصدق ملک، وزیر قانون اعظم نذیر تارڑ اور ڈپٹی چیئرمین پلاننگ کمیشن محمد جہانزیب بھی موجود تھے۔