بورےوالا میں وزیر اعلیٰ پنجاب مریم نواز کی جانب سے شروع کیے گئے رمضان نگہبان پیکیج (راشن) کی تقسیم کے لیے کرایہ پر حاصل کیے گئے رکشہ ڈرائیورز کو تاحال مکمل ادائیگی نہ کی جا سکی۔

ادائیگی نہ ہونے پر رکشہ ڈرائیورز نے پیر کو پریس کلب کے باہر احتجاجی مظاہرہ کیا۔

رکشہ ڈرائیوروں کا دعویٰ ہے کہ ابھی بھی 41 لاکھ روپے کے بقایا جات ادا کرنا باقی ہیں۔

مظاہرین کا کہنا تھا کہ کرایہ نہ ملنے پر گھروں میں فاقے ہیں، عید کی تیاریاں بھی ادھوری ہیں۔

رکشہ مالکان کا مؤقف ہے کہ سیکرٹری آر ٹی اے نے 2412 رکشے 22 یوم کے لیے حاصل کیے تھے۔

انھوں نے مزید بتایا کہ سیکرٹری آر ٹی اے صرف 2072 روپے یومیہ کرایہ دے رہا ہے۔

دوسری طرف سیکرٹری آر ٹی اے نے مؤقف اپنایا ہے کہ فنڈز ختم ہو چکے مزید فنڈز آئیں گے تو ادائیگیاں کر دیں گے۔