پیر کو لکھنؤ کے علاقے گُڑمبا میں ایک شخص اس بات پر مشتعل ہوگیا کہ اُس کی بیٹی، جو دسویں جماعت کی طالبہ تھی، ایک لڑکے سے فون پر بات کر رہی تھی۔ اس معاملے پر باپ بیٹی میں تکرار ہوئی اور باپ نے مشتعل ہوکر بیٹی کو مار ڈالا۔ ملزم موقع سے بھاگ گیا تھا تاہم منگل کی صبح پولیس نے اُسے گرفتار کرلیا۔

پولیس کو کسی نے فون پر مطلع کیا کہ لڑکی کی خون میں لت پت لاش گھر میں پڑی ہے۔ ڈپٹی کمشنر آف پولیس ابھیجیت شنکر نے بتایا کہ 40 سالہ ملزم کو، جو علاقے میں ایک دکان چلاتا ہے، پولیس نے گرفتار کرلیا۔

مقتولہ کے بھائی بہنوں نے بتایا کہ باپ نے پہلے دوپٹے سے اُسے باندھا اور پھر تیز دھار والے آلے سے اُس پر وار کیا جس کا نشانہ جسم پر دیکھا جاسکتا ہے۔ جسم پر مار پیٹ کے نشانات بھی ہیں۔ واردات کے وقت اُس کی ماں اپنے میکے گئی ہوئی تھی۔