پارلیمنٹ ہاؤس کے باہر میڈیا سے گفتگو میں رانا ثناء اللہ نے کہا کہ علی امین گنڈا پور ہوائی فائرنگ کر رہا ہے اسے کرنا کچھ نہیں ہے۔

انھوں نے کہا کہ اگر پی ٹی آئی سے اسٹیبلشمنٹ بات کرتی ہے تو کرے ہم نے کب روکا ہے، ان کا جھگڑا شروع سے ہی اسٹیبلشمنٹ سے ہے۔

ان کا کہنا تھا کہ پی ٹی آئی اپنے دور حکومت میں اپوزیشن کو ختم کرنا چاہتی تھی، جب ان کا اسٹیبلشمنٹ نے ساتھ نہ دیا تو کہنے لگے میرجعفر، میرصادق ہیں، پی ٹی آئی کا جھگڑا یہی ہے اسٹیبلشمنٹ مداخلت کرے۔

’وزیراعلیٰ کے پی بد امنی اور انتشار چاہتا ہے‘

دوسری طرف لیگی رہنما امیر مقام نے کہا کہ وزیراعلیٰ کے پی کو کچھ حاصل نہیں ہورہا لیکن وہ اپنا کام کر رہا ہے، ’وزیراعلیٰ کے پی بد امنی اور انتشار چاہتا ہے‘۔

انھوں نے مزید کہا کہ علی امین کے عزائم پہلے بھی ناکام بنائے اب بھی ناکام بنائیں گے، وہ کہتے ہیں کےپی میں فارم 45 کی حکومت ہے،ان کی سوچ کیا ہے، ان کی ایک ہی سوچ ہے گالیاں دو، الزامات لگا دو، جھوٹ بولو، اور پی ٹی آئی نے اپنے ورکروں کو بھی یہی ترغیب دے رکھی ہے۔