اسلام آباد میں کیبل چوری کرنے والا گینگ سرگرم ہے۔ سیکٹر ایف سیون تھری گلی نمبر 63 سے ٹیلیفون کیبلز چوری ہوگئیں۔

گلی میں موجود تمام سرکاری رہائش گاہوں کے ٹیلیفون بند ہوگئے، متاثرہ گلی میں چیئرمن سی ڈی اے، آئی جی اسلام آباد اور دیگر اہم شخصیات کے گھر ہیں۔

گینگ نے سیدعلی ناصر رضوی اور چیئرمین سی ڈی اے سمیت کئی گھروں کے ٹیلی فون خاموش کرا دیے۔

ابتدائی اطلاعات کے مطابق نامعلوم ملزمان کی جانب سے رات 3 سے 4 بجے کے درمیان واردات کی گئی۔

پولیس نے سی سی ٹی وی کیمروں کے ذریعے ملزمان کی شناخت شروع کردی۔

آج نیوز نے بلیوایریا میں کیبل چوری کی واردات کی ویڈیو حاصل کرلی۔ جس میں دیکھا گیا کہ اسلام آباد بلیو ایریا میں کیبل چور گینگ 2 گاڑیوں میں آیا، پہلے ملزمان نے کیبل کاٹنے کا سامان گڑھے میں پھینکا اور پھر تینوں ملزمان کیبل کاٹنے کیلئے گڑھے میں اتر گئے، جب کہ گاڑیوں میں موجود 2 ملزمان باہر پہرا دیتے رہے۔

اسلام آباد پولیس نے 3 ملزمان کو حراست میں لے لیا ہے، پولیس کا کہنا ہے کہ ایف 7 تھری میں چوری ہونے والی کیبل برآمد کرلی گئی ہے، واقعےمیں ملوث ملزمان کی تلاش جاری ہے۔

پولیس کا کہنا ہے کہ پورا نیٹ ورک شہر بھر میں وارداتوں میں ملوث ہے۔