سعودی سفیر نے اپنے خصوصی ویڈیو پیغام میں آئی سی سی ٹی 20 ورلڈ کپ 2024 کے حوالے سے پاکستانی قومی کرکٹ ٹیم کے لیے نیک خواہشات کا اظہار کیا۔

سعودی سفیر کا کہنا تھا کہ ٹی 20 ورلڈ کپ جیتنے پر پاکستانی قومی کرکٹ ٹیم اگلے سال حج پر شاہی مہمان ہوگی۔

سعودی سفیر نے کہا کہ پاکستانی ٹیم کے اپنے بھائیوں کے لیے میرا پیغام ہے کہ انشاء اللہ آپ یہ ٹورنامنٹ جیتیں گے اور پاکستانی عوام یقیناً ورلڈ کپ میں اپنی ٹیم کی کامیابی پر خوشی کا جشن منائیں گے۔

انہوں نے کہا کہ میں پاکستان کی خوشحالی اور ترقی کے لیے بھی دعا گو ہوں۔

واضح رہے کہ قومی کرکٹ ٹیم ٹی 20 ورلڈ کپ میں اپنی مہم کا آغاز 6 جون کو ڈیلس میں میزبان ٹیم امریکہ کے خلاف میچ سے کرے گی، اس کے بعد 9، 11 اور 16 جون کو بالترتیب بھارت، کینیڈا اور آئرلینڈ کے خلاف میچز کھیلے گی۔

گروپ اسٹیج کے بعد گروپ کی دو ٹاپ ٹیمیں سپر 8 مرحلے کے لیے ویسٹ انڈیز جائیں گی۔