جنوبی سرحد سے ملک میں داخل ہونے والے ان تاجکستانی شہریوں کو نیو یارک، فلاڈیلفیا اور لاس اینجلس میں گرفتار کیا گیا۔ انہیں بظاہر امیگریشن قوانین کی خلاف ورزی کی بنیاد پر پکڑا گیا ہے۔

امریکی خبر رساں ادارے کے مطابق یہ واضح نہیں ہوسکا کہ داعش کے گروپ سے ان کے مبینہ تعلق کی نوعیت کیا تھی تاہم یہ بات سامنے آئی ہے کہ امریکا کے مرکزی تفتیشی ادارے ایف بی آئی کی جوائنٹ ٹیررازم ٹاسک فورس نے ان پر نظر رکھی ہوئی تھی۔

تاجکستان کے یہ باشندے اس وقت یو ایس امیگریشن اینڈ کسٹمز انفورسمنٹ کی تحویل میں ہیں۔ انہیں یو ایس امیگریشن اینڈ کسٹمز انفورسمنٹ اور جوائنٹ ٹیررازم ٹاسک فورس نے مشترکہ کارروائی میں گرفتار کیا تھا۔ اب انہیں ملک بدر کرنے کی تیاری کی جارہی ہے۔

تاجکستان کے یہ تمام باشندے گزشتہ موسمِ بہار میں امریکا میں داخل ہوئے تھے اور امریکی حکومت کی اسکریننگ کے دوران ان کے حوالے سے کوئی مشکوک بات سامنے نہیں آئی تھی۔

ایف بی آئی اور داخلی سلامتی کے محکمے نے چند غیر امریکی باشندوں کو امیگریشن سے متعلق معاملات میں گرفتار کرنے کی تصدیق کی ہے۔ دونوں اداروں نے بتایا کہ امریکا اس وقت خطرناک کیفیت سے دوچار ہے۔