برطانوی میڈیا کے مطابق پاکستانی نژاد شبانہ محمود کو یہ اعزاز حاصل ہے کہ وہ پہلی مسلمان لارڈ چانسلر ہیں، انہوں نے اپنا حلف مسلمانوں کی مقدس کتاب قرآن پاک پر اُٹھایا۔

اس موقع پر شبانہ محمود نے کہا کہ مجھے فخر ہے کہ میں پہلی مسلم خاتون لارڈ چانسلر ہوں جو اردو بول سکتی ہے، یہ ذمہ داری استحقاق اور بوجھ دونوں ہے، اس ذمہ داری سے آنے والی نسلوں کے لیے دروازے کھلیں گے، اپنی ذمہ داریوں کو نبھاتے ہوئے بین الاقوامی قوانین کی حکمرانی اور انسانی حقوق کی پاسداری کو یقینی بناؤں گی۔

شبانہ محمود نے کہا کہ اسلام انصاف کا درس دیتا ہے اور میں اس فرض سے کسی صورت پیچھے نہیں ہٹوں گی۔

ان کا کہنا تھا کہ عدلیہ کو سیاسی دباؤ اور غیر ضروری اثر و رسوخ کے بغیر فیصلے کرنے چاہئیں۔

وزیر انصاف کی حیثیت سے اپنے عہدے کا حلف اٹھاتے ہوئے شبانہ محمود نے اس عزم کا اظہار کیا کہ پوری دنیا میں قانون کی حکمرانی اور حقوق انسانی کا دفاع کروں گی، عدلیہ کسی خوف اور دبائو کے بغیر فیصلے کرے۔