وائٹ ہاؤس میں پریس کانفرنس کرتے ہوئے ترجمان امریکی محکمہ خارجہ میتھیو ملر نے دہشت گردی کے خلاف پاکستان کے اقدامات اور قربانیوں کا اعتراف کیا اور ساتھ ہی حالیہ حملوں میں فوجی جوانوں کی شہادت پر اظہار افسوس بھی کیا۔

میتھیوملر نے کہا کہ افغان طالبان اپنی سرحدیں دہشت گردی کے لیے استعمال نہ ہونے دیں، علاقائی سلامتی کو لاحق خطرات سے نمٹنے کے لیے پاکستان کے ساتھ ہیں۔

انہوں نے مزید کہا کہ پاکستانی عوام نے دہشت گردی سے بہت نقصان اٹھایا، اس ناسور کا خاتمہ پاکستان اور امریکا کا مشترکہ مفاد ہے، واشنگٹن کئی معاملات میں پاکستان کے ساتھ مل کر کام کر رہا ہے، امریکا پاکستان کی معیشت بہتر کرنے کے لیے بھی کوشاں ہے۔

ترجمان امریکی محکمہ خارجہ نے بنگلا دیش میں ہونے والے حالیہ پر تشدد واقعات پر تشویش کا اظہار کرتے ہوئے کہا کہ 6 افراد کی ہلاکت کی خبریں دیکھی ہیں، بنگلا دیش میں پر امن مظاہرین پر تشدد کی مذمت کرتے ہیں۔

میتھو ملر کا مزید کہنا تھا کہ بنگلادیش میں پر تشدد واقعات پر گہری نظر ہے، بنگلادیش میں پرامن احتجاج پر زور دیتے ہیں، واشنگٹن اور ڈھاکا میں موجود سفارتخانہ صورتحال بھی مانیٹر کررہا ہے۔