کراچی کے تھانوں میں سپاہی کی ڈیوٹیاں رشوت دے کر لگنے کا انکشاف ہوا ہے، منگھو پیر تھانے کے سپاہی علی احمد نے کراچی پولیس کے منشی سسٹم کا راز فاش کردیا۔

سپاہی کا وڈیو بیان منظر عام پر آگیا جس میں اس نے کہا کہ سپاہی کو سکون کی نوکری کرنے پرمنشی کو یومیہ ایک ہزاردینا پڑتے ہیں، میرابیٹا کینسر کا مریض ہے، میں گھر کا واحد کفیل ہوں روز ہزار روپے منشی کو کیسے دوں؟

سپاہی علی احمد کے مطابق تھانوں میں رشوت کا بازار گرم ہے، سپاہی یومیہ ہزار روپے کیسے دیتے ہیں سوالات اٹھنا شروع ہوگئے۔

دوسری جانب ایس ایس پی ویسٹ حفیظ الرحمن بگٹی نے واقعے کا نوٹس لے لیا اور ڈی ایس پی منگھو پیر کو واقع سے متعلق تحقیقات کا حکم دے دیا۔