فلسطینی پناہ گزینوں کے لیے اقوام متحدہ کے ادارے نے تصدیق کی کہ وسطی غزہ میں اس کے زیرِ انتظام اسکولوں میں سے ایک پر اسرائیلی فضائی حملے میں ان کے چھ ملازمین ہلاک ہوگئے ہیں۔

غزہ کے شہری دفاع کے ترجمان محمود بسال نے بتایا کہ نصیرات پناہ گزین کیمپ میں الجوونی اسکول پر حملے میں 18 افراد جاں بحق ہوگئے۔ واضح رہے کہ غزہ میں اسرائیلی حملوں کے نتیجے میں بے گھر ہونے والے ہزاروں فلسطینی اس کیمپ کو پناہ گاہ کے طور پر استعمال کر رہے ہیں۔

اسرائیلی فوج کا دعویٰ ہے کہ اس نے سکول میں ان عسکریت پسندوں کو نشانہ بنایا ہے جو حملوں کی منصوبہ بندی کر رہے تھے۔ اقوام متحدہ کے سکریٹری جنرل انتونیو گوتیرس نے ایکس پر ایک پوسٹ میں کہا کہ یہ حملہ ’بین الاقوامی انسانی قانون کی خلاف ورزی‘ کے مترادف ہے۔