غیر ملکی میڈیا رپورٹ کے مطابق تھائی لینڈ میں ایک 36 سالہ شخص کو مریضوں کے نازک حصے کی غیر قانونی سرجری کرنے کے الزام میں گزشتہ ہفتے گرفتار کیا گیا۔

رپورٹ کے مطابق وسطی تھائی لینڈ کے شہر سموت ساکھون سے تعلق رکھنے والے کٹیکورن سونگری نامی شخص نے کبھی میڈیکل ٹریننگ حاصل نہیں کی تھی اور نہ ہی اس کے پاس کوئی لائسنس موجود تھا جس کے سبب وہ مریضوں کا علاج کرتا۔

رپورٹ میں بتایا گیا کہ کٹیکورن نے سوشل میڈیا پر اشتہار شائع کیا جس کے بعد اس نے ماہانہ دو سے تین مریضوں کے آپریشن بھی کیے۔ ایک مریض نے کٹیکورن سونگری کی جانب سے کیے گئے سلیکون امپلانٹ سے شدید انفیکشن پھیلنے کے بعد اس نے پولیس حکام کو اطلاع دی۔

جب پولیس کو جعلی ڈاکٹر کے حوالے سے اطلاع موصول ہوئی تو انہوں نے محکمہ صحت کے اہلکاروں کے ساتھ اسٹنگ آپریشن میں غیر لائسنس یافتہ ڈاکٹر کو گرفتار کرنے کا منصوبہ بنایا۔

انہوں نے ایک خفیہ ایجنٹ تیار کیا جسے سرجری کروانے کا بہانہ بنا کر بھیجا گیا، جب ایجنٹ کو ڈاکٹر نے گھر بلایا تو پولیس بھی وہاں پہنچ گئی اور جعلی ڈاکٹر کو اسی وقت گرفتار کر لیا۔

گرفتار ہونے کےبعد کٹیکورن سونگری نے اعتراف کیا کہ اس نے صرف نویں جماعت تک تعلیم حاصل کی ہے اور نوعمری میں ہی سرجری کرنا سیکھ لی تھی۔

رپورٹ کے مطابق جعلی ڈاکٹر نے 20 سال تک غیر قانونی سرجری کرنے کا اعتراف کرتے ہوئے کہا اس نے ہر ایک سے 150 ڈالر سے 600 ڈالر تک وصول کیے۔