غیر ملکی میڈیا رپورٹ کے مطابق جارجیا میں میکڈونلڈ کی ایک کارکن سابق امریکی صدر بل کلنٹن کو پہچان ہی نہ سکیں، جس کی ویڈیو سوشل میڈیا پر وائرل ہوگئی۔

رپورٹ کے مطابق سابق امریکی صدر بل کلنٹن جن کا شمار کبھی دنیا کی طاقتور شخصیات میں کیا جاتا تھا، انہیں ایک غیر متوقع صورتحال کا سامنا کرنا پڑا جب فوڈ کاؤنٹر پر ایک خاتون ملازم ابتدائی طور پر انہیں پہچاننے میں ناکام نظر آئیں۔

ویڈیو میں دیکھا جا سکتا ہے کہ42ویں امریکی صدر بل کلنٹن میکڈونلڈز کے کاؤنٹر پر موجود خاتون ورکر کے پاس گئے، ان سے ہاتھ ملایا جس کے بعد خاتون پہلے تو انہیں گھورتی رہیں اور جب انہوں نے اپنا تعارف کراتے ہوئے نام بتایا تو خاتون نے انہیں فورا گلے سے لگا لیا۔

وہاں موجود دیگر عملے نے سابق امریکی صدر کو دیکھتے ہی پہچان لیا تھا اور وہ ان کی تصاویر اور ویڈیوز بنانے میں مشغول ہوگئے تھے۔

کلنٹن کے ڈپٹی چیف آف اسٹاف کی جانب سے اس واقعے کی ویڈیو ایکس اکاؤنٹ پر پوسٹ کی گئی تھی جو دیکھتے ہی دیکھتے وائرل ہوگئی۔