ذرائع کے مطابق بینائی سے محروم افراد کا احتجاج تعلیمی اداروں میں عارضی ملازمتیں ختم ہونے پر کیا جا رہا ہے۔ پنجاب حکومت کی یقین دہانی کے باوجود مختلف محکموں سے 66 نابینا افراد کو نوکریوں سے نکالے جانے کیخلاف متاثرین سراپا احتجاج ہیں۔

ذرائع نے بتایا کہ اسپیشل کوٹہ میں بھرتی کیئے گئے سرکاری ملازمین نابینا افراد احتجاج کے لئے لیاقت باغ چوک پہنچ گئے اور اپنے مطالبات کے حق میں نعرے بازی شروع کر دی۔

مظاہرین کا کہنا ہے کہ پنجاب حکومت کی یقین دہانی کے باوجود 66 نابینا افراد کو نوکریوں سے نکالا گیا، تمام نابینا افراد راولپنڈی کے مختلف سرکاری اداروں میں ملازمت کر رہے تھے۔

مظاہرین نے واضح کیا کہ اپنے اپنے سابقہ محکموں میں دوبارہ نوکریوں پر بحالی تک احتجاج کریں گے، مظاہرے کی اطلاع پر پولیس نفری لیاقت باغ چوک پہنچ گئی ہے جہاں احتجاجی نابینا افراد سے مذاکرات کی کوشش جاری ہے۔