اسلام آباد ہائیکورٹ کے چیف جسٹس عامر فاروق نے سلمان اکرم راجہ کی تمام مقدمات میں حفاظتی ضمانت منظور کرلی، پی ٹی آئی رہنما کی ہر مقدمے میں 10، 10 ہزار روپے مچلکوں کی عوض حفاظتی ضمانت منظور کی گئی۔

پولیس رپورٹ میں بتایا گیا ہے کہ سلمان اکرم راجہ کے خلاف اسلام آباد میں 10 لاہور میں 6 جبکہ اٹک میں بھی دو مقدمات درج ہیں۔

سلمان اکرم راجہ نے کہا کہ عدالت ہمیں متعلقہ عدالتوں میں جانے کے لیے مزید وقت دے، جس پر چیف جسٹس اسلام آباد ہائیکورٹ نے کہا کہ آپ کی اس درخواست میں صرف مقدمات کی تفصیلات تک کی استدعا ہے، آپ حفاظتی ضمانت کے لیے درخواست دائر کر دیں، آپ حفاظتی ضمانت جہاں جہاں مقدمات ہیں ان کے لیے چاہتے ہیں؟۔

وکیل نے کہا کہ آپ حفاظتی ضمانت دے دیں ہم متعلقہ عدالت میں پیش ہو جائیں گے۔ جس پر عدالت نے سلمان اکرم راجہ کو حفاظتی ضمانت دیتے ہوئے متعلقہ عدالتوں میں پیش ہونے کی ہدایت کردی۔