اپوزیشن لیڈرقومی اسمبلی عمر ایوب نے چیئرمین پی ٹی آئی بیرسٹر گوہر،عامر ڈوگر و دیگر اپوزیشن اراکین کے ہمراہ پارلیمنٹ کے باہر میڈیا سے گفتگو میں کہا کہ ملک میں مارشل لا کی صورت حال بن چکی ہے، آج ہماری ایک کارکن کی پولیس تشدد کی وجہ سے موت واقع ہوئی ہے۔

عمر ایوب نے گفتگو کرتے ہوئے کہا آج بھی ہم نے کوشش کی کہ ہمیں فلور ملے، ہماری کوشش کے باوجود مائیک نہیں ملا، لیکن بدقسمتی سے یہاں سب کٹھ پتلیوں کا روپ دھار چکے ہیں۔

بیرسٹر گوہر نے کہا آٹھ فروری کو ہمارا مینڈیٹ چوری ہوا، آج تیرہواں اجلاس تھا آج تک جعلی مینڈیٹ والی حکومت نے ایک کام بھی نہیں کیا، چیف الیکش کمیشن ریٹائرڈ ہوچکے وزیر اعظم کی طرف سے مکمل خاموشی ہے۔

پی ٹی آئی رہنماؤں کا کہنا ہے ابھی پیکا ایکٹ ملک پر لاگو نہیں ہوا لیکن جمشید دستی پراس ایکٹ پر مقدمہ درج کیا جا چکا ہے، جب تک ہمیں بات کرنے کا موقع نہیں دیں گے، بائیکاٹ اور احتجاج ہوتا رہے گا۔