ترجمان دفتر خارجہ شفقت علی خان نے ہفتہ وار بریفنگ کے دوران میڈیا کے نمائندوں سے بات کرتے کہا کہ پاکستان کو امریکہ کی جانب سے بھارت کو جدید ٹیکنالوجی ہتھیاروں کی فراہمی کے اعلان پر تشویش ہے، ہم انڈو یو ایس مشترکہ بیان کو بے بنیاد قرار دیتے ہیں۔

شفقت علی خان نے کہا کہ دہشت گردی سے متاثرہ ملک کے طور پر پاکستان دنیا میں امن کا خواہاں ہے، ہماری دفاعی تیاریاں صرف اپنے دفاع کے لیے ہیں، ہم کسی کے خلاف کوئی جارحانہ عزائم نہیں رکھتے۔

ترجمان دفترخارجہ نے کہا کہ لیبیا کشتی حادثہ میں 16 لاشوں کی شناخت کی جا چکی ہے، نعشوں کی واپسی کے لیے کوششیں کر رہے ہیں، پاکستانی سفارتخانہ دیگر نعشوں کی شناخت میں مصروف عمل ہے۔

انھوں نے کہا کہ امریکہ کی جانب سے غیر قانونی تارکین وطن کی واپسی کا معاملہ پاک امریکہ باہمی رابطے کا حصہ ہے کوئی بھی ملک غیر قانونی تارکین وطن کو واپس بھیج سکتا ہے۔

ترجمان نے کہا کہ کشمیر میں دو نوجوانوں کو شہید کیا گیا ہے، پاکستان اسکی مذمت کرتا ہے کشمیری عوام کو اقوام متحدہ کے اصولوں کے مطابق حق خودارادیت ملنا چاہئے۔