خواتین کے عالمی دن کے موقع پر عورت مارچ کی منتظمین نے نیشنل پریس کلب سے ڈی چوک ریلی نکالنے کا اعلان کررکھا تھا، این او سی نہ ہونے پر پولیس نے مارچ سے روک دیا۔

عورت مارچ میں شریک خواتین نے ہاتھوں میں پلے کارڈز، پوسٹراور علامتی جنازے اٹھا کر احتجاج کیا اورانتظامیہ اور حکومت کے خلاف نعرے بازی بھی کی۔

عورت مارچ کی منتظمین نے کہا کہ حکومت عورتوں کے حقوق کیلئے پالیسی تو بناتی ہے لیکن اس پر عمل نہیں کیا جاتا۔

مارچ میں پولیس کی بھاری نفری کے علاوہ منتظمین کی جانب سے رضا کار تعینات کیے گئے تاکہ غیر متعلقہ افراد کو مارچ کا حصہ بننے سے روکا جاسکے۔

قبل ازیں اسلام آباد میں عورت مارچ کے تحت انتظامیہ سے باضابطہ اجازت نہ ملنے کے باوجود طے شدہ پروگرام کے مطابق نیشنل پریس کلب سے ڈی چوک تک ریلی نکالی گئی۔

پولیس نے ریڈ زون جانے والے راستوں کو بند کر رکھا تھا۔ نیشنل پریس کلب اسلام آباد کے باہر سے شروع ہونے والے عورت مارچ میں خواتین نے مختلف سلوگن بینر اٹھا رکھے ہیں۔

خواتین کی جانب سے عورت مارچ میں نعرے بازی کا سلسلہ جاری رہا۔ اسلام آباد پولیس کی بھاری نفری نیشنل پریس کلب کے اعتراف موجود رہی، جبکہ اسلام آباد کی لیڈی پولیس بھی عورت مارچ میں ڈیوٹی پر موجود تھی۔

ترجمان ٹریفک پولیس کے مطابق لاء اینڈ آرڈر صورتحال کے باعث ایکسپریس چوک اور سرینہ ہوٹل کے داخلی وخارجی راستے بند کئے گئے، جبکہ ٹریفک کیلئے نادرا، میریٹ اور مارگلہ روڈ استعمال کیا جاسکتا ہے، کلب روڈ سے ریڈ زون جانے والی ٹریفک سیونتھ ایونیو کا استعمال کرے۔

ڈان ڈاٹ کام کے مطابق حقوقِ نسواں کی کارکن اور مارچ کی مرکزی منتظمین میں شامل ڈاکٹر فرزانہ باری نے تصدیق کی کہ وہ گزشتہ برسوں کی طرح نیشنل پریس کلب کے باہر اجتماع کریں گے اور ڈی چوک کی جانب مارچ کرنے کی کوشش کریں گے تاکہ عالمی یومِ خواتین کو منایا جا سکے۔

ڈاکٹر فرزانہ باری کے مطابق، منتظمین نے کئی ماہ قبل اسلام آباد انتظامیہ کو باضابطہ درخواست دی تھی تاکہ نیشنل پریس کلب سے ڈی چوک تک مارچ کی اجازت حاصل کی جا سکے، تاہم تاحال اس کے لیے کوئی این او سی (عدم اعتراض سرٹیفکیٹ) جاری نہیں کیا گیا۔

انہوں نے بتایا کہ عورت مارچ کے منتظمین نے وزیرِاعظم شہباز شریف کو بھی خط لکھا ہے، جس میں ان سے درخواست کی گئی ہے کہ وہ اسلام آباد انتظامیہ کو ہدایت دیں کہ مارچ کے انعقاد کے لیے این او سی جاری کیا جائے۔ تاہم، انتظامیہ کی جانب سے ان سے کہا جا رہا ہے کہ رمضان المبارک کے باعث پروگرام کو مؤخر کر دیا جائے۔

ڈاکٹر فرزانہ باری نے واضح کیا کہ منتظمین پہلے ہی اس بات پر متفق ہو چکے ہیں کہ مارچ انتہائی سادگی سے کیا جائے گا، جس میں موسیقی یا کسی بھی قسم کی تقریبات شامل نہیں ہوں گی تاکہ رمضان کے تقدس کا احترام کیا جا سکے۔ تاہم، انہوں نے کہا کہ سال میں صرف ایک بار آنے والے اس دن کو مکمل طور پر نظر انداز کرنا ممکن نہیں۔

صنفی مساوات کی عالمی فہرست جاری، خواتین کے حقوق پر پاکستان کا نیچے سے دوسرا نمبر

منتظمین نے شرکا سے دن ایک بجے نیشنل پریس کلب کے سامنے جمع ہونے کی اپیل کی، جبکہ تقریباً چار بجے ڈی چوک کی طرف مارچ کرنے کی کوشش کی گئی۔

انسٹا گرام پر جاری کیے گئے کھلے خط میں عورت مارچ کے منتظمین نے وزیرِاعظم کو آگاہ کیا کہ گزشتہ چھ سالوں میں متعدد کوششوں کے باوجود انہیں این او سی حاصل کرنے میں مشکلات کا سامنا رہا ہے، اور انہیں تحفظ اور احتجاج کے حق سے محروم رکھا گیا۔

خط میں یہ بھی کہا گیا کہ ماضی میں مذہبی انتہا پسند گروہوں، پولیس اور اسلام آباد انتظامیہ کے ہاتھوں عورت مارچ کے منتظمین کو تشدد کا سامنا کرنا پڑا، جس سے عالمی برادری میں پاکستان میں خواتین کے حقوق کے حوالے سے منفی تاثر گیا ہے۔