فیڈرل انویسٹی گیشن ایجنسی (ایف آئی اے) نے ملزم کے خلاف پیکا ایکٹ کی سیکشن 11 کے تحت گستاخانہ مواد کی تشہیر پر مقدمہ درج کیا تھا۔ پٹیشنر کے وکیل کا مؤقف تھا کہ مدعی نے ایف آئی اے حکام سے ملی بھگت کرکے مقدمہ درج کروایا اور درخواست گزار مقدمے کا نامزد ملزم نہیں تھا بلکہ دس ماہ بعد کیس میں ملوث کیا گیا۔

تحقیقات کے دوران سامنے آیا کہ ملزم کے موبائل فون سے گستاخانہ مواد واٹس ایپ کے ذریعے بھیجا گیا، جبکہ ٹیکنیکل تجزیے کے مطابق، ملزم کے فون سے توہین رسالت، توہین اہل بیت اور توہین قرآن سے متعلق خاکے، گرافکس اور تصاویر شیئر کی گئیں۔ پولیس ریکارڈ کے مطابق، جس موبائل فون سے یہ مواد شیئر کیا گیا وہ ملزم کے نام پر رجسٹرڈ ہے، جبکہ ٹیکنیکل اینالسز رپورٹ بظاہر ملزم کے جرم میں ملوث ہونے کو ثابت کرتی ہے۔

عدالت نے قرار دیا کہ اس مرحلے پر ملزم ضمانت کا حقدار نہیں۔ تاہم، ضمانت کیس میں دی گئی عدالتی آبزرویشنز ٹرائل کورٹ پر اثر انداز نہیں ہوں گی اور مقدمے کی سماعت میرٹ پر کی جائے گی۔