پولیس ذرائع کے مطابق سی سی ٹی وی فوٹیج میں مبینہ ملزم فیاض کو مقتولہ بچی کے ساتھ دیکھا جا سکتا ہے۔ ملزم نے دورانِ تفتیش موبائل فون مانگنے پر اسے توڑ دیا، تاہم پولیس نے موبائل ڈیٹا حاصل کر لیا ہے، جس سے معلوم ہوا ہے کہ وہ رات بھر جاگتا رہا جو کہ اس کے معمول کے برعکس ہے۔

کراچی: لیاقت آباد سے مردہ ملنے والی 5 سالہ بچی سے زیادتی کی تصدیق

تحقیقات کے مطابق فیاض کے بیانات میں تضاد پایا گیا ہے۔ اس کا کہنا ہے کہ اس کا سویرا کے گھر آنا جانا نہیں تھا جبکہ بچی کے بہن بھائیوں نے بتایا کہ فیاض روزانہ ان کے گھر آتا تھا۔ مزید یہ کہ وہ جنازے میں بھی شریک نہیں ہوا، حالانکہ وہ قریبی رشتے دار ہے۔

پولیس نے ملزم کے ڈی این اے سیمپل حاصل کر لیے ہیں اور میڈیکل رپورٹ کا انتظار کیا جا رہا ہے، جس کے بعد حتمی کارروائی کا فیصلہ کیا جائے گا۔

ادھر تفتیشی ذرائع کا کہنا ہے کہ سویرا کا والد نشے کا عادی ہے اور وہ پولیس کی بجائے ملزم کی حمایت کر رہا ہے، جس سے معاملہ مزید الجھتا جا رہا ہے۔

یاد رہے کہ پانچ سالہ سویرا کی لاش بدھ کے روز لیاقت آباد ندی سے ملی تھی، جس کے اندرونی اعضا بھی غائب تھے،واقعہ پر اہل علاقہ اور خاندان کے افراد میں شدید غم و غصہ پایا جاتا ہے۔