راولپنڈی کی انسداد دہشت گری عدالت کے جج امجد علی شاہ نے جی ایچ کیو حملہ کیس کی متفرق درخواست کی سماعت کی، کنول شوزب نے بیرون ملک جانے کی اجازت کے لیے درخواست دی تھی۔

کنول شوزب کی جانب سے استدعا کی گئی کہ بیٹے کے تعلیمی ادارے میں سالانہ تقریب میں شرکت کرنی ہے، جس پر پراسیکیوٹر نے کہا کہ کنول شوزب 9 مئی کے راولپنڈی کے 12 مقدمات میں ملزمہ ہے، صرف ایک مقدمے میں فرد جرم عائد ہوئی ہے، باقی 11 مقدمات میں نقول تقسیم ہو چکی ہیں، مقدمات کا ٹرائل 4 ماہ میں مکمل کرنے کا سپریم کورٹ کا حکم بھی آ چکا ہے۔

پراسیکیوٹر سید ظہیر شاہ نے دلائل دیتے ہوئے کہا کہ فرد جرم عائد کرنے کے لیے ملزمہ کی حاضری ضروری ہے، اگر ملزمہ بیرون ملک چلی گئیں تو کیس ٹرائل متاثر ہوگا۔

انسداد دہشت گری عدالت کے جج امجد علی شاہ نے کنول شوذب کی بیرون ملک جانے کی اجازت سے متعلق درخواست پر فیصلہ سنادیا۔

عدالت نے پی ٹی آئی رہنماء کو بیرون ملک جانے سے روک دیا اور پراسیکوشن کے دلائل سے اتفاق کرتے ہوئے درخواست خارج کر دی۔