پنجاب تنظیم کون چلائے گا؟ پاکستان تحریک انصاف مخمصے کا شکار ہوگئی، پنجاب میں پارٹی کے معاملات چلانے کے لیے بنائی گئی کمیٹی میں ترمیم کردی گئی، جس کا نیا نوٹیفکیشن جاری کردیا گیا۔

نئے نوٹیفکیشن کے مطابق اب کمیٹی تحریک انصاف کے 9 رہنماؤں پر مشتمل ہوگی، کمیٹی میں سلمان اکرم راجہ ، عمر ایوب خان ، عالیہ حمزہ ملک ، احمد خان بچھر ، میاں اکرم عثمان، رائے حسن نواز عون عباس پپی ، احمد چھٹہ اور ملک تیمور بھی شامل ہیں۔

ایڈیشنل سیکرٹری جنرل پی ٹی آئی فردوس شمیم نقوی کی جانب سے نیا نوٹیفکیشن جاری کیا گیا۔

یاد رہے کہ 2 روز قبل بنائی گئی کمیٹی کے بعد پارٹی میں شدید اختلافات سامنے آئے تھے، عالیہ حمزہ ملک کو کمیٹی میں شامل نہ کیے جانے پر پارٹی رہنماؤں میں اختلاف پیدا ہوا، اختلافات سامنے آنے اور شدید تنقید کے بعد مرکزی قیادت نے نیا نوٹیفکیشن جاری کیا۔