منیٰ میں قیام کے دوران حجاج کرام ظہر، عصر، مغرب اور عشاء کی نمازیں ادا کریں گے۔ حج کے سب سے اہم رکن وقوف عرفہ کے لیے نو ذوالحجہ کو تمام عازمین منیٰ سے میدانِ عرفات روانہ ہوں گے۔ میدانِ عرفات میں وہ حج کا عظیم خطبہ سنیں گے اور اس کے بعد ظہر و عصر کی نمازیں ادا کریں گے۔

عازمین سورج غروب ہونے تک عرفات کے میدان میں قیام کریں گے، جس کے بعد مزدلفہ روانہ ہوں گے۔ مزدلفہ میں مغرب اور عشاء کی نمازیں ملا کر ادا کی جائیں گی، اور کھلے آسمان تلے رات گزارنے کے دوران حجاج رمی کے لیے کنکریاں بھی جمع کریں گے۔

پاکستانی عازمین حج کے کھانے پر 15 کروڑ سے زائد اخراجات

دس ذوالحجہ کو حجاج کرام مزدلفہ سے جمرات کے لیے روانہ ہوں گے جہاں بڑے شیطان کو کنکریاں ماریں گے، قربانی کریں گے، حلق یا قصر کروا کر احرام کھول دیں گے اور اس کے بعد طوافِ زیارت ادا کریں گے۔

سعودی وزارتِ حج و عمرہ کی جانب سے رواں سال بھی حج کے انتظامات انتہائی منظم انداز میں مکمل کر لیے گئے ہیں۔ اس سال حج کا خطبہ اردو، انگریزی اور دیگر زبانوں سمیت دنیا کی 35 مختلف زبانوں میں براہ راست ترجمے کے ساتھ نشر کیا جائے گا تاکہ دنیا بھر کے مسلمان اس عظیم پیغام کو اپنی زبان میں سمجھ سکیں۔

یہ مناسکِ حج کا وہ روحانی سفر ہے جس میں اتحاد، اطاعت اور قربانی کا عملی مظاہرہ پوری دنیا کے سامنے آتا ہے، اور امت مسلمہ ایک بار پھر ایمان، عبادت اور اخوت کا عملی پیغام دیتی ہے۔