پاکستان کرکٹ ٹیم کی دورہ بنگلادیش اور ویسٹ انڈیز کی تیاریاں جاری ہیں، سیریز کے لیے پاکستان ٹی 20 اسکواڈ کا اعلان رواں ہفتے کیے جانے کا امکان ہے۔

ذرائع کے مطابق پاکستان ٹی 20 اسکواڈ میں زیادہ تبدیلیوں کا امکان نہیں، بابراعظم، محمد رضوان اور شاہین آفریدی بدستور ٹیم کا حصہ نہیں ہوں گے جبکہ اسپنر سفیان مقیم کو پاکستانی ٹی 20 اسکواڈ میں شامل کیا جائے گا۔

پاکستان نے بنگلہ دیش میں 3 ٹی ٹوئنٹی میچز کی سیریز کھیلنی ہے جبکہ ویسٹ انڈیز کے خلاف 3 ٹی ٹوئنٹی اور 3 ون ڈے میچز شیڈول ہیں جبکہ پاکستان ٹی 20 ٹیم کا کیمپ 7 جولائی سے کراچی میں شیڈول ہے۔

ٹی 20 ورلڈ کپ کے پیش نظر پی سی بی نے ویسٹ انڈیز کرکٹ بورڈ ون ڈے میچز ٹی 20 میں تبدیل کرنے کی تجویز دی ہے جبکہ ویسٹ انڈیز کرکٹ بورڈ نے میچز میں تبدیلی کی تجویز کا تاحال کوئی جواب نہیں دیا۔

معاملات طے پاگئے تو بنگلہ دیش کے ساتھ دورہ ویسٹ انڈیز کے لیے بھی اسکواڈ کا اعلان ہوگا، ون ڈے میچز تبدیل نہ ہوئے تو ون ڈے ٹیم کے اضافی کھلاڑیوں کا اعلان کیا جائے گا۔