ایم کیو ایم کے سینئر رہنماؤں نے ان افواہوں کو مسترد کرتے ہوئے تصدیق کی ہے کہ الطاف حسین اس وقت لندن کے ایک مقامی اسپتال میں زیر علاج ہیں، جہاں ان کے خون کی منتقلی (Blood Transfusion) اور کچھ دیگر ضروری میڈیکل ٹیسٹ کیے گئے ہیں۔

پارٹی ذرائع کے مطابق وہ ڈاکٹروں کی زیر نگرانی ہیں اور ان کی طبیعت مستحکم ہے۔

ایم کیو ایم (لندن) کے ترجمان اور قریبی ساتھی مصطفیٰ عزیز آبادی نے بھی سوشل میڈیا پلیٹ فارم ”ایکس“ (سابقہ ٹوئٹر) پر بیان جاری کرتے ہوئے کہا کہ ’الطاف حسین کا مقامی اسپتال میں میڈیکل چیک اپ کیا گیا، ابتدائی معائنے کے بعد ڈاکٹروں نے مزید تشخیصی ٹیسٹ تجویز کیے ہیں۔‘

انہوں نے لکھا کہ ’الطاف حسین کو متعدد تشخیصی ٹیسٹ تجویز کیے گئے جن میں بلڈ ٹیسٹ، ای سی جی، سی ٹی اسکین، ایکسرے اور الٹراساؤنڈ شامل ہیں۔ ڈاکٹروں نے ان کی عمومی صحت کو دیکھتے ہوئے خون کی منتقلی (Blood Transfusion) کی بھی سفارش کی، جو کہ مکمل کر لی گئی ہے‘۔

مصطفیٰ عزیزآبادی نے بتایا کہ ’الطاف حسین کافی عرصے سے شدید ذہنی دباؤ کا شکار ہیں، جس میں نہ صرف اندرونی و بیرونی سیاسی دباؤ، بلکہ لندن میں جاری قانونی مقدمات اور مالی مشکلات بھی شامل ہیں‘۔

بیان میں مزید کہا گیا ہے کہ ’ہم اس وقت ان کی صحت کے حوالے سے ایک مشکل مرحلے سے گزر رہے ہیں۔ الطاف بھائی کی صحت یابی کے لیے دعاؤں کی اپیل ہے۔‘

خیال رہے کہ الطاف حسین گزشتہ تین دہائیوں سے برطانیہ میں خودساختہ جلاوطنی کی زندگی گزار رہے ہیں اور انہیں برطانوی شہریت بھی حاصل ہے۔ ان کے قریبی ذرائع کے مطابق وہ اس وقت بھی ایک میڈیکل ٹیم کی قریبی نگرانی میں ہیں۔