پاکستان نے 111 رنز کا ہدف 14ویں اوور میں باآسانی پورا کرلیا۔

پاکستان کرکٹ ٹیم کے کپتان سلمان علی آغا نے جنوبی افریقا کے خلاف ٹاس جیت کر پہلے فیلڈنگ کا فیصلہ کیا۔

آج کے میچ کے لیے پاکستان کی پلئینگ الیون میں ایک تبدیلی کی گئی تھی۔ شاہین آفریدی کی جگہ سلمان مرزا کو ٹیم میں شامل کیا گیا تھا۔

پہلی اننگز میں پاکستانی بولز کے سامنے جنوبی افریقی بلے باز زیادہ دیر نہ ٹک سکے جس کے نتیجے میں پوری پروٹیز ٹیم 110 رنز بناکر آؤٹ ہوگئی۔

جنوبی افریقا کے 7 بلے باز ڈبل رنز بھی اسکور نہ کرسکے۔ پروٹیز صرف ڈیوالڈ بریوس 25 اور ڈونون فریرا 15رنز کے ساتھ نمایاں رہے۔اس کے علاوہ کاربن بوش نے 11 اور بارٹ مین نے 12 رنز بنائے۔

پاکستان کی طرف سے فہیم اشرف نے شاندار بولنگ کرتے ہوئے 4 وکٹیں حاصل کیں جبکہ سلمان مرزا نے 3 کھلاڑیوں کو آؤٹ کیا۔ نسیم شاہ نے 2 اور ابرار احمد کے حصے میں ایک وکٹ آئی۔

میچ کی دوسری اننگز میں پاکستان نے جنوبی افریقا کا 111 رنز کا ہدف صائم ایوب کی دھواں دھار اننگز کی بدولت چودہویں اوور میں ایک وکٹ کے نقصان پر حاصل کرلیا۔

گرین شرٹس کی جانب سے صاحبزادہ فرحان 28 رنز بناکر آؤٹ ہوئے۔صائم ایوب 38 گیندوں پر 71 اور بابر 11 رنز بناکر ناقابل شکست رہے۔

اس طرح قومی ٹیم نے جنوبی افریقا کو دوسرے ٹی ٹوئنٹی میچ میں 9 وکٹوں سے شکست دے کر سیریز 1-1 سے برابر کر دی۔

خیال رہے کہ اس سے قبل راولپنڈی میں جنوبی افریقا نے پہلے ٹی20 میچ میں پاکستان کو 55 رنز سے شکست دی تھی۔