پرواز کے دوران انہوں نے وہیل چیئر زمین پر ہی رہنے دی اور خلا میں قیام کے دوران انہوں نے تقریباً 3 منٹ تک کششِ ثقل کے بغیر ’بے وزنی‘ کا تجربہ کیا، جہاں وہ کیپسول میں تیرتی رہیں۔

اس پرواز میں اسپیس ایکس کے سابق اعلیٰ عہدیدار ہانس کوئنیگسمین بھی شامل تھے، جنہوں نے اس مشن کی تنظیم میں کردار ادا کیا اور بلیو اوریجن کے ساتھ مل کر اس سفر کی معاونت کی جبکہ اس کے ٹکٹ کی قیمت ظاہر نہیں کی گئی ہے۔

مائیکائلا بینتھاؤس یورپی خلائی ایجنسی کے گریجویٹ ٹرینی پروگرام سے وابستہ ہیں اور اس سے قبل 2022 میں پیرا بولک پرواز کے ذریعے مختصر وزن سے آزادی کا تجربہ حاصل کر چکی تھیں۔

پرواز کے بعد ان کا کہنا تھا کہ خاص طور پر معذوری کے بعد انہیں یقین نہیں تھا کہ خلا کا سفر ان کے لیے ممکن ہو سکے گا۔ انہوں نے کہا کہ معذور افراد کے خلا میں جانے کی کوئی مثال موجود نہیں تھی، اسی لیے یہ موقع ان کے لیے غیر متوقع تھا۔

اگرچہ یہ مشن نجی نوعیت کا تھا اور یورپی خلائی ایجنسی اس میں شامل نہیں تھی، تاہم رواں سال ای ایس اے نے ایک معذور خلاباز کو مستقبل میں بین الاقوامی خلائی اسٹیشن کے لیے کلیئرنس دی ہے۔

مائیکائلا بینتھاؤس کا کہنا ہے کہ ان کا مقصد نہ صرف خلا بلکہ زمین پر بھی معذور افراد کے لیے رسائی کو بہتر بنانا ہے۔ ان کا کہنا تھا کہ آپ کو اپنے خوابوں سے کبھی دستبردار نہیں ہونا چاہیے۔

بلیو اوریجن کے مطابق اس پرواز کے ساتھ خلا کا سفر کرنے والوں کی مجموعی تعداد 86 ہو گئی ہے۔ کمپنی کے بانی جیف بیزوس نے بلیو اوریجن 2000 میں قائم کی تھی اور 2021 میں پہلی انسانی خلائی پرواز مکمل کی گئی تھی۔