ذائع کے مطابق اسلام آباد میں مقامی حکومتوں سے متعلق آرڈیننس کی وفاقی کابینہ سے باضابطہ منظوری لے لی گئی ہے۔

وفاقی حکومت نے لوکل گورنمنٹ ترمیمی آرڈیننس کے اجرا کا فیصلہ کیا ہے اور ترمیمی آرڈیننس جاری کرنے کے لیے سمری صدر مملکت آصف علی زرداری کو بھجوا دی گئی ہے۔

ذرائع کے مطابق صدر مملکت کے دستخط کے بعد باضابطہ آرڈیننس جاری کردیا جائے گا۔

مجوزہ آرڈیننس کے مطابق بلدیاتی انتخابات کے لیے پنجاب کا ماڈل اپنایا جائے گا، اسلام آباد میں 3 قومی اسمبلی کے حلقوں پر 3 ٹاونز، کارپوریشن بنائی جائیں گی۔

مجوزہ نکات کے مطابق ہر ٹاؤن کارپوریشن کا میئر اور 2 ڈپٹی میئر ہوں گے، سی ڈی اے کے کچھ اختیارات لے کر بلدیات کو بااختیار بنایا جائے گا۔

قبل ازیں وفاقی کابینہ نے وفاقی دارالحکومت میں شیڈول بلدیاتی انتخابات ملتوی کرنے کی منظوری دی تھی۔ یہ فیصلہ وزیراعظم شہباز شریف کی زیر صدارت ہونے والے مختصر اجلاس میں کیا گیا تھا، جس میں کابینہ کمیٹی برائے قانون سازی کے 3 دسمبر اور 30 دسمبر کے اجلاسوں کے فیصلوں کی توثیق بھی کی گئی تھی۔

واضح رہے کہ الیکشن کمیشن نے اسلام آباد میں بلدیاتی انتخابات کے لیے 15 فروری کی تاریخ مقرر کی تھی اور نتائج 16 سے 19 فروری کے درمیان مرتب کیے جانے تھے تاہم نئی قانون سازی اور مجوزہ ترامیم کی وجہ سے انتخابات ملتوی کردیے گئے۔