ذرائع کے مطابق وزیراعظم شہباز شریف اسلام آباد سے سعودی عرب کے شہر جدہ کے لیے روانہ ہوگئے ہیں۔ ان کے ہمراہ ایک اعلیٰ سطح کا وفد بھی موجود ہے جو مختلف سفارتی اور دوطرفہ امور پر ہونے والی ملاقاتوں میں شریک ہوگا۔

وزیرِ اعظم شہباز شریف کے ہمراہ نائب وزیرِ اعظم اسحاق ڈار، وزیرِ اطلاعات عطاء تارڑ اور معاونِ خصوصی طارق فاطمی بھی روانہ ہوئے ہیں۔

وزیراعظم اپنے دورے کے دوران سعودی قیادت سے ملاقات کریں گے، جس میں پاکستان اور سعودی عرب کے تعلقات، خطے کی موجودہ صورتحال، کشیدگی میں کمی اور امن و استحکام سے متعلق امور پر بات چیت متوقع ہے۔

ذرائع کا کہنا ہے کہ وزیراعظم شہباز شریف سعودی ولی عہد محمد بن سلمان سے بھی ملاقات کریں گے، جس میں باہمی تعاون، اقتصادی روابط اور علاقائی امور پر تفصیلی تبادلہ خیال کیا جائے گا۔

سعودی عرب کے بعد وزیراعظم ترکیہ جائیں گے، جہاں وہ اناطولیہ ڈپلومیسی فورم میں شرکت کریں گے۔ اس فورم کے دوران وزیراعظم مختلف عالمی رہنماؤں سے ملاقاتیں کریں گے اور پاکستان کا مؤقف اہم عالمی و علاقائی معاملات پر پیش کریں گے۔

بعد ازاں وزیراعظم قطر کا بھی دورہ کریں گے، جہاں دوطرفہ تعلقات کو مزید فروغ دینے اور سفارتی روابط کو مضبوط بنانے کے حوالے سے ملاقاتیں ہوں گی۔