اسلام آباد:وزیراعظم محمد نواز شریف کے صاحبزادے حسین نواز کہتے ہیں آف شور کمپنیاں کبھی نہیں چھپائیں اور نہ چھپانے کی ضرورت ہے ،ایک سو اسی دن پاکستان سے باہر رہنے والوں کو انکم ٹیکس گوشوارے جمع کرانے کی ضرورت نہیں ہوتی ، الزام لگانے والوں نے ملک کا انکم ٹیکس قانون نہیں پڑھا۔

تفصیلات کے مطابق بین الاقوامی ادارے کی خفیہ رپورٹس لیک ہونے سے متعلق وضاحت کرتے ہوئے حسین نواز نے کہا کہ آف شور کمپنیوں کا مقصد قانونی طور پر غیر ضروری ٹیکس سے بچنا ہے بیرون ملک جائیداد خریدی ،منی لانڈرنگ کا اس سے کوئی تعلق نہیں، کوئی غیر قانونی کام نہیں کیا ۔

انہوں نے کہا کہ سعودی عرب میں لگائی گئی کمپنی کے اثاثے فروخت کرکے آف شور جائیداد خریدی الزام لگانے والوں نے ملک کا انکم ٹیکس قانون نہیں پڑھا ، ایک سو اسی دن ملک سے باہر رہنے والوں کو انکم ٹیکس کے گوشوارے جمع کرانے کی ضرورت نہیں ہوتی ۔

حسین نواز نے کہا کہ انیس سو بانوے سے بیرون ملک مقیم ہوں مریم نواز کے نام پر کچھ شیئرز ہیں جو ٹرسٹ ارینجمنٹس کے طور پر رکھے گئے ہیں ۔ ان کا کہنا تھا کہ اگر پھر بھی کسی کی تسلی نہیں ہوتی تو وہ رضاکارانہ طور پرملکی اداروں کے سامنے پیش ہونے کے لیے تیار ہیں ۔