کوہستان:خیبرپختونخوا،گلگت بلتستان اور آزاد کشمیر میں بارش کے دوران مختلف واقعات میں جاں بحق افراد کی تعداد اٹھانوے ہوگئی۔ سو سے زائد افراد زخمی ہیں ،گلگت بلتستان میں تعلیمی ادارے بند کردیئے گئے ہیں۔

تفصیلات کے مطابق خیبرپختونخوا میں بارش سے ہونے والی تباہ کاریاں تھم نہ سکیں،سب سے زیادہ نقصان شانگلہ اور کوہستان میں ہوا،شانگلہ میں بارش کے دوران غوربند،چسرکر کے علاقوں میں لینڈسلائیڈنگ اور مختلف حادثات میں دو سو سے زائد مکانات منہدم اور انیس افراد جاں بحق ہوئے جبکہ چھبیس سے زائد زخمی ہوئے۔

کوہستان میں اوتورنالہ کے مقام پر چار مکانات پر آسمانی بجلی گرنے سے دس افراد جاں بحق ہوئے،جس کے بعد کوہستان میں جاں بحق افراد کی تعداد اٹھارہ ہوگئی ،حادثات میں بیس سے زائد افراد زخمی بھی ہوئے ہیں۔

سوات میں بارش سے چار باغ،مالم جبہ،قبل،کلہ گئی،کوکاری میں سب سے زیادہ نقصانات ہوئے،حادثات میں نو افراد جاں بحق،چار زخمی ہوئے۔

اپردیر میں سات افراد جاں بحق اور تین زخمی ہوئے،مانسہرہ میں آٹھ افراد جاں بحق اور متعدد زخمی،چترال میں دو افراد جاں بحق اور پانچ زخمی ہوئے،بٹ گرام میں دو افراد جاں بحق،بنوں میں بھی دو افراد جاں بحق ہوئے،مالاکنڈ اور چارسدہ میں بھی ایک ایک شخص جاں بحق ہوا۔

گلگت بلتستان میں بھی بارش نے نظام زندگی درہم برہم کرکے رکھ دیا ہے،بارش کے باعث لینڈسلائیڈنگ سے رابطہ سڑکیں بند ہوگئی ہیں،جس کے بعد صوبے بھر میں تعلیمی ادارے بند کردیے گئے ہیں ،سب سے زیادہ نقصان چلاس میں ہوا جہاں لینڈسلائیڈنگ اور دیگر حادثات کے دوران جاں بحق افراد کی تعداد گیارہ ہوگئی،آزاد کشمیرمیں وادی نیلم کے علاقے خام گام لینڈ سلائیڈنگ سے پانچ بچے اور تین خواتین جان سے گئے۔