اسلام آباد:چیئرمین تحریک انصاف عمران خان نے کہا ہے کہ دنیا بھر میں پانامہ لیکس پر تحقیقات کا آغاز ہوگیا ہے،حکمرانوں نے کرپشن کرکے اربوں روپے باہر بھجوائے منی لانڈرنگ اور ٹیکس چوری کرنے والوں کو کوئی پکڑنے والا نہیں ہے۔

اسلام آباد میں پارلیمنٹ اور پی ٹی وی حملہ کیس میں عمران خان انسداد دہشت گردی عدالت کے باہر آئے مگر عدالت میں پیش نہ ہوئے، عدالت کے باہر میڈیا سے گفتگو کرتے ہوئے عمران خان نے کہا کہ پرامن احتجاج ہرکسی کا جمہوری حق ہے، انہوں نے کوئی جرم نہیں کیا اس لئے ضمانت بھی نہیں کرائیں گے جبکہ کارکنوں کے مقدمات ختم نہ کئے گئے تو وہ احتجاج کریں گے۔

عمران خان کا کہنا تھا کہ دنیا بھر میں پانامہ لیکس پر تحقیقات کا آغاز ہوگیا ہے،حکمرانوں نے کرپشن کرکے اربوں روپے باہر بھجوائے، کیا ہمارا قانون انہیں نہیں پکڑے گا۔

عمران خان نے صحافیوں سے غیر رسمی گفتگو کرتے ہوئے شاہد آفریدی پر کڑی تنقید کی، ان کا کہنا تھا کہ آفریدی کو جو سمجھایا تھا اس نے اس کا الٹ کیا، آفریدی کی جگہ مصباح الحق کپتان ہوتے تو نتائج کچھ اور ہوتے۔