لاہور:پنجاب اسمبلی میں پانامہ لیکس کے انکشافات پر قرار داد پیش کرنے کی اجازت نہ ملنے پر اپوزیشن نے ایوان میں ہنگامہ آرائی کی اور اسپیکر ڈائس کے سامنے دھرنا دیا۔

تفصیلات کے مطابق وقفہ سوالات کے اختتام پر اپوزیشن لیڈر میاں محمود الرشید نے پانامہ لیکس کے انکشافات پر ایوان میں قرار داد پیش کرنے کی اجازت طلب کی۔اسپیکر نے پندرہ منٹ کے وقفے کے بعد قرار داد پیش کرنے کا مشورہ دیا۔جس پر اپوزیشن نے احتجاج کرتے ہوئے احتجاجی بینرز ایوان میں لہرانا شروع کردئیے۔اور حکومت کیخلاف شدید نعرے بازی کی اپوزیشن اراکین نے اسپیکر ڈائس کے سامنے احتجاجی دھرنا د ے دیا۔

کچھ دیر احتجاج کے بعد اپوزیشن اراکین اپنی نشستوں پر واپس آگئے،محمود الرشید کا کہنا تھا کہ ان کی قرار داد صرف شریف برادران سے متعلق نہیں بلکہ دوسو سے زائد ان افراد سے متعلق جن کی آف شور کمپنیوں کے حوالے سے تفصیلات سامنے آئی ہیں۔