اسلام آباد: سپریم کورٹ نے سندھ ہائی کورٹ کا فیصلہ برقرار رکھتے ہوئے ماڈل ایان کو ملک سے باہر جانے کی اجازت دے دی ہے۔

مقامی عدالت،ہائیکورٹ کے بعد اب سپریم کورٹ نے بھی ماڈل ایان علی کا نام ای سی ایل سے نکالنے کا فیصلہ سنا دیا ہے۔

فیصلہ سپریم کورٹ کے دورکنی بینچ کے سربراہ جسٹس اعجاز افضل نے پڑھ کے سنایا۔ جس میں وزارت داخلہ اور محکمہ کسٹمز کی درخواستوں کو خارج کرتے ہوئے سندھ ہائی کورٹ کے فیصلے کوبرقراررکھا گیا۔ ایان کا نام ای سی ایل سے نکالنے کیلئے باقاعدہ نوٹیفکیشن جاری کیا جائے گا۔

سپریم کورٹ کی جانب سے جاری تفصیلی فیصلہ سات پیراگرافس پر مشتمل ہے، فیصلے میں کہا گیا ہے کہ فوجداری مقدمے میں التوا ءکے باعث کسی کی نقل وحرکت پر پابندی عائد نہیں کی جا سکتی۔ایان علی کسی ایسے کیس میں ملوث نہیں کہ اس کا نام ای سی ایل میں رکھا جائے، نہ ان پر ایسا کوئی کیس ہے جس سے عوامی دولت کو نقصان پہنچا ہو۔

فیصلے کے متن میں مزید کہا گیا ہے کہ عدالت یہ نہیں سمجھتی کہ سندھ ہائی کورٹ سے ایان علی کو ملنے والا ریلیف واپس لیا جائے اور نہ ہی ایسے ٹھوس شواہد ملے جس پر ان کی نقل و حرکت پر پابندی عائد کی جائے۔

 اس حوالے سے مزید پڑھئیے: ایان علی کا نام ای سی ایل سے نکالنے کا فیصلہ

واضح رہے کہ ایان علی کو 14 مارچ 2015 میں منی لانڈرنگ کیس میں بے نظیر انٹرنیشنل ائیرپورٹ سے گرفتارکیا گیا تھا اور ان سے برآمد ہونے والے پانچ لاکھ ڈالر بھی حکام نے قبضے میں لے لیے تھے۔

ایان علی نے اپنے منی لانڈرنگ کیس کے حوالے سے پانچ بار عدالت میں پیشی دی ہے ۔پانچ بار جیل میں پیشی دینے کے بعد ماڈل ایان علی کو 14 جولائی 2015 کو جیل سے رہائی مل گئی تھی۔

]]> Pakistan https://www.aaj.tv/news/33085 Wed, 13 Apr 2016 09:52:01 +0500 none@none.com (مریم زبیری)