کراچی :کراچی کے علاقے گڈاپ ٹاون میں سی ٹی ڈی سے مقابلے میں کالعدم تنظیم کے دو دہشتگرد ہلاک جبکہ ایک دہشتگرد کو گرفتار کرلیا گیا اور چار فرار ہوگئے،دہشتگردوں کے پاس سے بھاری مقدار میں دھماکا خیز مواد برآمد کرلیا گیا۔

تفصیلات کے مطابق سی ٹی ڈی نے رات گئے خفیہ اطلاع پر گڈاپ ٹاون کے علاقے برفت گوٹھ میں کارروائی کی،کارروائی میں دو دہشتگرد مارے گئے جبکہ ایک کو گرفتار کرلیا گیا، انچارچ سی ٹی ڈی عمر خطاب نے میڈیا کو بتایا کہ پولیس مقابلے میں دو دہشتگرد حماد اور ریحان ہلاک ہوگئے جبکہ ایک کو گرفتار کرلیا گیا۔

سی ٹی ڈی کے مطابق دہشتگردوں کے کمپاونڈ سے بھاری مقدار میں دھماکہ خیز مواد، بم بنانے کی فیکٹری،بارود سے بھری موٹرسائیکل اور دیسی ساختہ بم بھی برآمد ہوئے۔

دہشتگرد کمپاونڈ میں بارودی مواد تیار کر کے شہر کے مختلف علاقوں میں لے جاتے تھے، ہلاک دہشت گردوں کا تعلق القاعدہ برصغیر سے تھا، دہشتگرد رینجرز اور پولیس چوکیوں پر حملوں میں ملوث تھے۔

سی ٹی ڈی کے مطابق دہشتگردوں سے فائرنگ کا تبادلہ تقریبا دو گھنٹے تک جاری رہا،جس کے نتیجے میں دونوں دہشتگرد موقع پر ہی ہلاک ہوگئے جبکہ ان کے چار ساتھی رات کی تاریکی کا فائدہ اٹھاتے ہوئے فرار ہوگئے۔