اسلام آباد:حکومت نے پانامہ پیپرز پر سیاسی جماعتوں کے پارلیمانی قائدین سے رابطہ، اعتماد سازی اور مشاورت کے بعد حتمی قدم اٹھانے کا فیصلہ کیا ہے ۔

وزیراعظم نوازشریف کی ہدایت پرمسلم لیگ ن کا اعلیٰ سطحی مشاورتی اجلاس وفاقی وزیرخزانہ اسحاق ڈارکی زیرصدارت ہوا ۔ اجلاس میں وزیراعلیٰ پنجاب شہبازشریف، پرویزرشید ، خواجہ سعد رفیق ، خواجہ آصف ، خرم دستگیر، احسن اقبال ، ذاہد حامد ، عرفان صدیق ، عبدالقادربلوچ ، سینیٹر مشاہد اللہ اور انوشہ رحمان نے شرکت کی۔اجلاس میں پانامہ لیکس سے متعلق تحقیقاتی کمیشن اور اس کے دائرہ کارسمیت دیگرمعاملات پرتفصیلی تبادلہ خیال کیا ۔

اجلاس میں فیصلہ کیا گیا کہ سیاسی جماعتوں کے پارلیمانی قائدین سے رابطہ کرکے انہیں اعتماد میں لیا جائے گا اور مشاورت کے بعد حتمی قدم اٹھایا جائے گا شرکاءنے زوردیا کہ سیاسی عدم استحکام پیدا کرنے والی کوششوں کوناکام بنانے کے ساتھ ساتھ تعمیرترقی کے منصوبوں پرزیادہ تیزرفتاری کے ساتھ عمل کیا جائے ۔ اجلاس میں ملک میں امن وامان کی بحالی ، توانائی کے بحران کے خاتمے ، پاک چین اقتصادی راہداری اورانفرااسٹریکچرکے منصوبوں کوتیزرفتار سے جاری رکھنے پر اتفاق ہوا۔