بنی گالہ:تحریک انصاف کے چیئرمین عمران خان کہتے ہیں جوڈیشل کمیشن تحقیقات کے لیے نہیں بلکہ خود کو بری کرنے کے لیے بنایا جا رہا ہے، پرامن تحریک کامیاب نہ ہوئی تو ہر اقدام اٹھائیں گے۔

پاناما لیکس کے معاملے پر برپا شور کے تناظر میں لندن کا پانچ روزہ دورہ کرنے کے بعد تحریک انصاف کے چیئرمین عمران خان وطن پہنچ گئے۔بنی گالہ کے باہرمیڈیا سے گفتگو کرتے ہوئے عمران خان کا کہنا تھا کہ وزیراعظم کی بیٹی ایک کمیشن تشکیل دے رہی ہے اور یہ جوڈیشل کمیشن تحقیقات کے لیے نہیں بلکہ خود کو بری کرانے کے لیے بنایا جا رہا ہے۔

انہوں نے کہا کہ اس کمیشن کو تسلیم نہیں کرتے جس کا مقصد ٹیکس چوری کو چھپانا ہو۔پاناما لیکس کی وجہ سے موقع ملا ہے کہ ہم اپنے ادارے ٹھیک کر لیں۔

عمران خان کا کہنا تھا کہ حکمران عوام سے مذاق کر رہے ہیں،اگر پرامن تحریک کامیاب نہ ہوئی تو ہراقدام اٹھائیں گے، جہاں تک جانا پڑا جائیں گے۔تحریک انصاف کے چیئرمین نے وزیراعظم نوازشریف کی صحتیابی کے لیے بھی دعا کی اور ان کی جلد وطن واپسی کی خواہش کا اظہار کیا۔