وزیر مملکت پانی و بجلی عابد شیر علی نے کہا ہے کہ عمران خان ملک میں فساد چاہتے ہیں،وہ دوہزار اٹھارہ میں لوڈشیڈنگ کے خاتمے،گوادر پورٹ اور چین کی سرمایہ کاری پر تکلیف میں مبتلا ہیں۔

لاہور کے مقامی ہوٹل میں تقریب سے خطاب اور میڈیا سے گفتگو کرتے ہوئے عابد شیر علی کا کہنا تھا کہ زیرتعمیر پاور پلانٹس دوہزار سترہ تک مکمل ہوجائیں گے،عمران خان کو تکلیف ہے کہ دو ہزار اٹھارہ میں لوڈشیڈنگ کا خاتمہ ہوجائے گا۔

عابد شیر علی نے کہا کہ عمران خان پاکستان میں فساد پھیلانا چاہتے ہیں،اب پاکستان عمران خان کی خواہشات پر نہیں چلے گا۔عابد شیر علی کا کہنا تھا کہ ان کے لیڈر طاہر القادری جیسے نہیں ہیں،وہ دو بار اپنے کارکنوں کو دھوکا دے چکے ہیں۔

وزیر مملکت پانی و بجلی عابد شیر علی نے کہا کہ تاجر رات آٹھ بجے تک کاروبار بند کردیں،ورنہ ان سے بجلی کے اضافی نرخ وصول کئے جائیں گے۔