کراچی:سابق صوبائی وزیرداخلہ ذولفقارمرزا مقدمات کی سماعت کے لیے کراچی کی انسدادہشتگردی عدالت میں پیش ہوئے۔تاہم جج کے رخصت پر ہونے کے باعث سماعت اکیس مئی تک ملتوی کردی گئی،ذولفقارمرزا کا کہنا تھا کہ آئندہ تاریخ پر فرد جرم عائد کی جائے ، یا ہمیں چھوڑ دیا جائے یا جیل بھیجا جائے۔

بدین کے تھانوں میں اپنے خلاف درج چار مقدمات کی سماعت کے لیے ذولفقار مرزا اپنے ایک سو تین ساتھیوں سمیت کراچی کی انسداد دہشت گردی کی عدالت نمبر ایک میں پیش ہوئے تاہم متعلقہ جج کے رخصت پر چلے جانے کے باعث سماعت اکیس مئی تک ملتوی کردی گئی۔

عدالت کے باہرمیڈیا سے گفتگو میں ذولفقار مرزا کا کہنا تھا کہ بدین کے لوگوں نے مجھے میری ذاتی حیثیت میں ووٹ دئے ، سندھ میں اربوں کھربوں کی کرپشن ہوئی ، سندھ کے چوروں کو پانامہ لیکس کے پیچھے چھپنے نہیں دیں گے۔ ذولفقار مرزا کا کہنا تھا کہ حکمران جماعت کے سربراہ کی بہن محکمہ آبپاشی میں بڑی کرپشن میں ملوث ہیں۔ذولفقار مرزا نے کہا کہ قادر پٹیل کب تک بھاگتے رہتے ، واپس آکر اچھا فیصلہ کیا۔

مصطفی کمال اچھا کام کر رہے ہیں ، کچھ سوالات کا جواب ان سے وقت آنے پر لیں گے۔ مرزا کا کہنا تھا کہ آئندہ تاریخ پر فرد جرم عائد کی جائے ، یا تو ہمیں چھوڑ دیں یا جیل بھیج دیں۔