کراچی :مصطفی کمال کی پاک سرزمین پارٹی آج کراچی میں عوامی قوت کا مظاہرہ کرے گی،انیس قائمخانی کہتے ہیں کہ آج کے جلسے میں ایک سے پانچ لاکھ لوگ شریک ہوں گے۔کراچی والے صرف پاکستانی ہیں مختلف بنیادوں تفریق ختم کرنا ہوگی۔

پاک سرزمین پارٹی کا پہلا سیاسی معرکہ،پارٹی رہنما باغ جناح گراونڈ میں لاکھوں کامجمع اکٹھا کرنے کیلئے پرعزم ہیں۔جلسہ گاہ کے دورے کے موقع پرانیس قائمخانی نے کہا کہ آج کے جلسے سے یہ پیغام دینا ہے کہ کراچی والے صرف پاکستانی ہیں،مذہب فرقے اورسیاسی بنیادوں پرتفریق ختم کریں گے۔جبکہ رضا ہارون کا کہنا تھا کہ پارٹی جلسے سے پہلے ہی کامیاب ہوگئی ہے۔

جلسے کیلئے تیس فٹ اونچااسٹیج تیارکیاگیا ہے جبکہ جلسہ گاہ میں قومی پرچم لہرائے گئے ہیں۔جلسے کے شرکا کیلئے خیرمقدمی بینرزسے جلسہ گاہ آنے والے راستوں پرآویزاں کئے گئے ہیں ۔جلسہ گاہ کے اطراف پولیس کے ایک ہزارچارسوافسران اور اہلکار تعینات ہونگے ،جن میں سات ایس پیز، سترہ ڈی ایس پیز اور اڑتیس تھانوں کے ایس ایچ اوز بھی شامل ہیں ۔پولیس کی باون موبائلز اور دوسو موٹر سائیکل سوار بھی سیکیورٹی پرموجود رہیں گے۔
رینجرز کے سات سوجوانوں کے علاوہ ریزرو فورس کے پچھتر جوان بھی موجود رہیں گے۔